Daawo Sawirada Madaxweyne Gaas iyo Bulshada Gaalkacyo oo fikrado is dhaafsadey

Arbaca 09, 04, 2014 Madaxweynaha Dawaladda Puntland Dr. Cabdi-weli Max’ed Cali Gaas iyo qaar ka mid ah golayaasha Dawladda oo safarkiisa ku wehelinayay ayaa maanta magaalada Galkacayo ee xarunta Gobolka Mudug kula shiray bulshada kala duwan ee ku dhaqan gobolkaasi.

Bulshada kulanka ka qayb gashay oo aad u fara badnayd ayaa madaxweynaha dawladda Puntland usoo gudbiyay talooyin kala duwan kuwaasi oo ay ku tilmaamayeen inay hormuud u noqon karaan in Gobolka Mudug gaar ahaana magaalada Galkacayo wax looga qaban karo baahiyaha ka taagan, isla markaana ay muhiim tahay in bulshada wada tashi lagala yeesho tallabooyinka la qaadi karo.

Waxay sidoo kale muujiyeen inay aad uga xun yihiin dilkii maalinamdii dorraad garoonka diyaaradaha ee Galkacayo loogu gaystay laba sarkaal oo ajaanib ah una shaqaynayay hay’adaha Qaramada Midoobay, iyagoo tacsi u diray ehelada ay kasoo jeedeen, waxayna ballan qaadeen inay muujin doonaan dareen tilmaamaya sida ay shacabka Gobolku uga xun yihiin dhacdadaasi.

Madaxweynha Dawladda Puntland Dr. Cabdi-weli Max’ed Cali Gaas ayaa uga mahad celiyay bulshada magaalada Galkacayo sidii diiranayd ee ay ugu soo dhoweeyeen magaalada.

Madaxweynha Dawladda Puntland Dr. Cabdi-weli ayaa si qota dheer u dhagaystay talooyinka kala duwan ee kasoo baxayay bulshadii uu maanta kula kulmay magaalada Galkacayo, wuxuuna si cad u tilmaamay in uu qaadanayo oo ku dhaqmi doono inta ugu wanaagsan talooyinka ay bulshada Gobolka Mudug usoo gidbiyeen hogaanka sare ee Dawladda Puntland.

Madaxweyne Gaas ayaa sidoo kale tilmaamay in ujeedka safarkiisa Gobolka Mudug uu ku salaysan yahay sidii ay dawladdu u waraysan lahayd ulana tashan lahayd Bulshada, si loo helo isbedelkii ay dawladdiisu ballan qaaday.

Kulanka oo qaatay saacado fara badan ayaa hal kudhig looga dhigay “Kulanka Wada Tashiga Dawladda Iyo Shacabka Galkacayo” waxaana soo qaban qaabisay hay’adda cilmi barista Puntland ee PDRC.

-DHAMAAD-