Khamiis 10, 04, 2014 Madaxweynaha Dawladda Puntland Dr. Cabdi-weli Max’ed Cali Gaas ayaa maanta booqasho rasmi ah ku tagay machadka xanaanada xoolaha ee ku yaalla magaalada Galkacayo ee xarunta Gobolka Mudug.
Madaxweynaha waxaa booqashada uu ku tagay machadkaasi ku weheliyay masuuliyiin ka mid ah golayaasha dawladda, waxayna xarunta machadka kula kulmeen ardayda wax ka barata kuwaasi oo sharaxaado kala duwan ka siiyay tacliinta ay ka bartaan machadka xanaanada xoolaha ee Magaalada Galkacayo.
Madaxweynaha ayaa u mahad celiyay hay’adda Tadaamun oo iyadu hir galisay machadkaasi, wuxuu sidoo kale ardayda wax ka barata machada xanaanada xoolaha kula dardaarmay inay waxbarashada sii wataan ilaa ay ka dhamaystiraan.
Madaxweynaha Dawladda Puntland Dr. Cabd-weli ayaa ardayda wax ka barata machadka ku booriyey in barashada xanaanaynt xooluhu ay tahay mid muhiimad weyn u leh dalka, maadaama aynu nahay bulsho ku tiirsan xoolaha nool.
Wasiir ku xigeenka Wasaaradda Xanaanada Xoolaha Puntland Cabdi-weli Seed oo kulanka ka qayb galay ayaa sheegay in machadkaani uu qiime weyn ugu fadhiyo wasaaraddiisa, isla markaana ay si gaar ah ula socon doonaan ardayda wax ka barata machadka xanaanada xoolaha ee Galkacayo.
Cabdi-raxmaan Cabdirsaq Cabdiraxmaan madax Hay’adda Tadaamun oo iyadu hir galisay machadkaasi ayaa sheegay inay ku faraxsan yihiin in Madaxweynaha Dawladda Puntland Dr. Cabdi-weli Max’ed Cali Gaas uu soo booqdo machadka, isla markaana uu wax ka ogaado qaabka uu shaqeeyo.
Ardayda wax ka barta machadka Xanaanaa Xoola ee Galkacayo ayaa iyaguna si diiran usoo dhoweeyey Madwxeweyne Gaas, waxayna sheegeen inay dadaal dheeraad ah ku bixin doonaan wax barashada xanaanada xoolaha, isla marlaana aysan dayici doonin fursada ay haystaan, iyagoo sharaxaado kala duwan Madaxweynaha ka siiyay qaabka ay wax u bartaan.
Sawirada hoos ka daawo
—DHAMAAD—
Xafiiska Saxaafada ee Madaxtooyada Puntland
