Muqdisho–9 Nov.2014–Pi– Galabta Waxaa Garoonka Diyaaradaha ee Aaden cade Ayrboorti kusoo gabagaboobey kulan aad xasaasi u ahaa oo Beesha Caalamka Wafdi ka socda ay la qaateen Raysal Wasaaraha Dowlada Federaalka Cabdiwali Sheikh Axmed iyo Madaxweynaha Dowlada Federaalka Soomaaliya Xasan Sheikh Maxamuud, kulanku wuxuu ahaa mid aad xasaasi u ah oo si kulul loo wada hadlayay.
Kulankii u horeeyey mid mid ayaa Beesha Caalamku ula yeelatay Madaxweynaha iyo Raysal Wasaaraha waxaana mid walba laga dhagaystey dhankiisa wuxuu qabo iyadoo Beesha caalamku dhankooda si wada jira ay ugu sheegeen sababta loogu yeerey labada Masuul.
Sida ay Puntlandi Xogta ku heleen Waxaa Madaxda Dowlada Federaalka loo sheegey in ay Beesha Caalamku kharash iyo Wakhti badan galiyeen Soomaaliya iyo Dowladá Federaalka taas dhigeedana Wax badan laga filayay Dhinaca Dowlada Federaalka Soomaaliya laakiin Waxyaabaha maalmahaan ka socda Villa Soomaaliya iyo Baarlamaanka dhexdiisa aysan Beesha Caalamku aqbali karin iyadoo wali Beesha caalamku aysan ka raja dhigin hanaankii geedi socodka lagu hiigsanayay Qorshihii 2016.
Madaxweynaha Waxaa loo sheegey in Beesha Caalamku ay ka dharagsan tahay isqabqabsiga hada socda iyo wuxuu ku salaysan yahay, Laakiin loo bahan yahay tanaasul iyo ku dhaqanka xaqiiqda ka jirta Dalka, Beesha Caalamkuna ay kasoo baxdey Balanqaadkeedii ay u sameeyeen Soomaaliya sidaas awgeed madaxda Dalka looga baahan yahay iney joojiyaan habdhaqankii laga dhaxley Dowladihii Kumeelgaarka.
Wadahadal dheer ka dib waxaa Madaxweynaha iyo Raysal wasaarahaba loosoo jeediyey iyadoo la raaciyey inuu yahay xalka kaliya ee Beesha Caalmku ay xiligaan aragto inuu yahay inaan sinaba loo aqbalayn in Xukuumada hada jirta la rido, iyadoo Beesha caalmku ay Daliilsanayaan Eedeymaha lagu eedeynayo Raysal wasaaraha iyo Xukuumadiisa iney yihiin waxyaabo laga gudbi karo abuurina kara Wada shaqayn cusub oo labada dhinacba daacad ka yihiin.
Raysal wasaaraha waxaa la amrey inuu ka noqdo isku shaandheyntii uu ku sameeyey qaar kamid ah Xukuumadiisa, isla markaasna sameeyo isku shaandheyn guud oo saameynaysa guud ahaan xukuumada, iyadoo la raaciyey inuu Madaxweynuhuna tixgaliyo Dastuurka iyo isku shaandheynta uusameyn doono raysal wasaaruhu.
Qodobka kale ee xasaasiga ah oo Madaxweynuhu isku dayay inuu hor istaago wuxuu ahaa oo markii dambe lawada qaatey in Ergeyga Gaarka ah ee Qaramada Midoobey Nickolas Kay uu isagu hubinayo in la raaco wadadaan cusub ilaa laga gaarayo 2016-ka.
Sida aan Xogta ku helney mid kamid ah xubnaha ka socday Beesha caalamka ayaa madasha wadahadalka ka yiri in Dowlada Federaalku ay ogsaanaato in Doorka Beesha caalamku uu yahay hubinta heshiisyadii lagu dhisey Dowlada Federaalka, tixgalinta Dastuurkuna, Wadashaqayn hufan tasoo horseedeyso in si habsami ah loogaaro guusha la hiigsanayo 2016, Ergeygaan wuxuu ka dhawaajiyey in dalku uu wali ku jiro Xaalad adag mana jirto buu yiri Wax isbadal ah oo u dheexeeya xiligii ku meelgaarka iyo hada sababtuna waatan aan maanta halkaan u fadhino buu yiri.
Iskusoo duboo kulankii maanta wuxuu u muuqdey mid ay Beesha caalmku go’aankoodu uu cadaa kasoo ahaa in uusan jiri karin Wax mooshin la yiraahdo ilaa 2016, waxaana si toosa farta loogu fiiqey Madaxweyne Xasan Sheikh oo la la xiriirinayo inuu isagu ka dambeeyo Mooshinka ayb wadaan Xildhibaanada qaarkood.
Wararka kale ee ay Puntlandi heleen waxay sheegayaan inuusan Madaxweyne xasan Sheikh uusan ku qanacsaneyn kulanka Beesha Caalamka iyo qaabkii loola hadley.
Xubnaha Beesha caalamku waxay ka socdeen Maraykanka. Qaramada Midoobey oo nickolas Kay matalayay iyo Midowga Yurub oo Ingiriisku hogaaminayay
Puntlandi.com
Muqdisho/Nairobi